Ndërmarrja Publike “Pastrimi dhe Gjelbërimi” në Kumanovë ka realizuar gjatë fundjavës aksione pastrimi në disa pjesë të qytetit, përfshirë rrugën kryesore të lagjes së njohur si “Barakat”, mbi Lagjen e Trimave, si dhe rrugën pranë varrezave myslimane, në drejtim të fshatit Rramanli, raporton TVFesta.mk.
Këto ndërhyrje vijnë pas disa denoncimeve dhe reagimeve të qytetarëve në rrjetet sociale, të cilët kishin shprehur pakënaqësi për gjendjen e rrugëve dhe mungesën e pastrimit të rregullt në këto zona.

Gjatë fundjavës, ekipet e ndërmarrjes publike kanë pastruar rrugën kryesore të lagjes “Barakat”, një segment që shfrytëzohet çdo ditë nga banorët e kësaj pjese të Kumanovës.
Një tjetër ndërhyrje është realizuar edhe në rrugën pranë varrezave myslimane, në drejtim të fshatit Rramanli, ku gjithashtu është bërë pastrimi i hapësirës rrugore.
Qytetarët kishin ngritur shqetësime në rrjetet sociale për gjendjen e papastër të disa rrugëve, duke kërkuar nga institucionet kompetente që të ndërmarrin masa për mirëmbajtjen e tyre.
Aksionet e realizuara gjatë fundjavës kanë përmirësuar pastërtinë në këto segmente, ndërsa mbetet e rëndësishme që mirëmbajtja e rrugëve të bëhet në mënyrë të vazhdueshme dhe jo vetëm pas denoncimeve të qytetarëve.

