Qytetarët do të vazhdojnë të jenë të detyruar t’i mbajnë me vete kartat fizike të identitetit dhe patentat e shoferit, edhe pse këto dokumente tashmë janë të disponueshme në formë elektronike përmes aplikacionit të ri celular “m.Uslugi” (m.Shërbimet).

Për momentin, dokumentet dixhitale nuk do të pranohen gjatë kontrolleve të identifikimit nga policia, pasi njohja e tyre zyrtare kërkon ndryshime në kuadrin ligjor ekzistues.

Ministri i Transformimit Dixhital, Stefan Andonovski, konfirmoi për SDK.mk se qytetarët do të duhet të paraqesin një kartë identiteti fizike ose patentë shoferi gjatë kontrolleve policore. Ai theksoi se tashmë po punohet për ndryshimet e nevojshme në ligje dhe rregullore; megjithatë, derisa këto ndryshime të hyjnë në fuqi, dokumentet fizike (plastike) mbeten të detyrueshme për qëllime identifikimi.

Aplikacioni i ri “m.Uslugi” (m.Shërbimet), i cili u prezantua zyrtarisht dje, ofron qasje në dokumente dixhitale, shërbime publike dhe njoftime nga institucionet. Përdorimi i aplikacionit është falas dhe vullnetar, ndërsa planifikohet që në të ardhmen funksionalitetet e tij të zgjerohen – përfshirë shtimin e mundësive për pagesa elektronike.