Ka ndërruar jetë Samka Ibraimovski, kryetar i Partisë për Emancipimin e Plotë të Romëve (PCER), ish-deputet në Kuvendin e Maqedonisë dhe ish-ministër pa portofol në Qeveri, raporton tvfesta.mk.

Lajmi për ndarjen e tij nga jeta është bërë i ditur nga portali “Roma Press”.

Ibraimovski ishte një figurë e njohur e skenës politike në Maqedoninë e Veriut, veçanërisht për angazhimin e tij shumëvjeçar në përfaqësimin dhe mbrojtjen e të drejtave të komunitetit rom.

Gjatë karrierës së tij politike, ai ushtroi disa funksione të rëndësishme institucionale, përfshirë atë të deputetit në Kuvend dhe ministrit pa portofol në Qeveri.

Si kryetar i PCER-së, Ibraimovski ishte i angazhuar në promovimin e barazisë, përfaqësimit politik dhe përmirësimit të pozitës së komunitetit rom në shoqëri.

Ndarja e tij nga jeta shënon humbjen e një prej përfaqësuesve të njohur politikë të komunitetit rom në vend.

Deri më tani nuk janë publikuar informacione zyrtare lidhur me shkakun e vdekjes apo detaje të tjera për ceremoninë mortore.