Me rastin e 11 Nëntorit, Ditës së Çlirimit të Kumanovës, në qytet do të organizohet gara tradicionale rrugore për nxënësit e shkollave fillore dhe të mesme, një aktivitet sportiv që synon promovimin e frymës garuese, aktivitetit fizik dhe shprehive të shëndetshme te të rinjtë, raporton TVFesta.mk

Gara do të mbahet të martën, më 10 nëntor 2026, duke filluar nga ora 12:00, ndërsa grumbullimi i pjesëmarrësve është paraparë në orën 11:30, në relacionin Sheshi i Qytetit – Shtëpia e Zejtarëve në Kumanovë.

Në këtë aktivitet sportiv do të kenë mundësi të marrin pjesë nxënës nga të gjitha shkollat fillore dhe të mesme të Kumanovës, të ndarë në kategori të ndryshme sipas moshës dhe nivelit arsimor.

Sipas organizatorëve, për nxënësit nga klasa e parë deri në të shtatën, si dhe për ata të klasave të teta dhe të nënta, secila shkollë mund të paraqesë më së shumti pesë garues meshkuj dhe pesë garuese femra për secilën kategori.

Ndërkohë, për shkollat e mesme, përkatësisht nxënësit e viteve të para, të dyta, të treta dhe të katërta, është paraparë pjesëmarrja e deri në 15 nxënësve dhe 15 nxënëseve nga secila shkollë.

Tre garuesit më të mirë në secilën kategori do të shpërblehen me medalje, diploma dhe bluza sportive, si mirënjohje për rezultatet e arritura gjatë garës.

Paraqitja e pjesëmarrësve do të bëhet në vendin ku organizohet aktiviteti, pranë delegatit të garës, profesorit Fidan Arsovski, ndërsa për informacione shtesë është vënë në dispozicion numri i telefonit 070/534-623.

Organizatorët bëjnë të ditur se nxënësit duhet të jenë të veshur me bluzat sportive të shkollave përkatëse. Gjithashtu, është theksuar se nxënësit që nuk kanë kryer kontroll mjekësor do të marrin pjesë nën përgjegjësinë e arsimtarit shoqërues.

Gara tradicionale rrugore është pjesë e programit të aktiviteteve sportive që organizohen për nder të 11 Nëntorit – Ditës së Çlirimit të Kumanovës, me qëllim përfshirjen e të rinjve në manifestimet që shënojnë këtë datë të rëndësishme për qytetin.

Organizator i aktivitetit është Lidhja Komunale e Sportit Shkollor në Kumanovë, nën patronazhin e Këshillit të Komunës së Kumanovës dhe kryetarit të komunës, Maksim Dimitrievski.

Përmes kësaj gare synohet jo vetëm nxitja e konkurrencës së shëndetshme mes nxënësve, por edhe forcimi i bashkëpunimit ndërmjet shkollave dhe promovimi i sportit si pjesë e rëndësishme e zhvillimit fizik dhe shoqëror të të rinjve. /tvfesta