Pas humbjes nga Austria, Dardanët synojnë të rikthehen te rezultatet pozitive. Përballja me Izraelin është mundësi për të marrë pikë të rëndësishme në Ligën e Kombeve.

Kombëtarja e Kosovës rikthehet sonte në fushë për një tjetër sfidë në Ligën e Kombeve. Dardanët përballen me Izraelin në stadiumin Nagyerdei, në qytetin Debrecen të Hungarisë, me fillim nga ora 20:45.

Pas një fillimi pozitiv, me fitoren 1:0 kundër Republikës së Irlandës, Kosova pësoi humbje 3:1 në udhëtim ndaj Austrisë. Tashmë skuadra kërkon të rikthehet te rezultatet pozitive në takimin e tretë të Grupit B3.

Edhe Izraeli vjen në këtë përballje pas dy humbjeve. Fillimisht u mposht 3:1 nga Austria, ndërsa më pas pësoi disfatë 3:0 kundër Republikës së Irlandës.

Për Kosovën, takimi i sotëm përfaqëson një mundësi për të siguruar tri pikë dhe për të përmirësuar pozicionin në grup. Megjithatë, skuadra duhet të tregojë kujdes, pasi çdo gabim mund të kushtojë në një garë me vetëm gjashtë ndeshje.

Kjo përballje vjen në një periudhë me kalendar të ngjeshur për Dardanët. Vetëm tri ditë më vonë, më 4 tetor, Kosova do ta presë Austrinë në shtëpi. Rezultatet e këtyre dy ndeshjeve do të kenë rëndësi për vazhdimin e rrugëtimit në grup.

Sytë e tifozëve shqiptarë sonte do të jenë të drejtuar nga Debreceni, ku Kosova do të kërkojë fitoren e dytë në këtë edicion të Ligës së Kombeve.