Policia e Kumanovës ka ngritur kallëzim penal kundër pesë punonjësve të Agjencisë së Ushqimit dhe Veterinarisë, për shkak të ekzistimit të dyshimit të bazuar për kryerjen e veprës penale “keqpërdorim i pozitës dhe autoritetit zyrtar”, raporton Televizioni FESTA.

Në njoftimin e Ministrisë së Punëve të Brendshme bëhet e ditur se kallëzimi penal është ngritur ndaj 5 personave të punësuar në Agjencinë e Ushqimit dhe Veterinarisë, një nga komuna e Likovës, dy nga Shkupi, një nga Manastiri dhe një nga Shtipi.

“Më 30 maj 2024, është kryer kontroll në ambientet e Agjencisë së Ushqimit dhe Veterinarisë – Njësia Rajonale e Kumanovës dhe nga inspektimi i listave të rregullsisë së shkuarjes në punë është konstatuar se i raportuari i parë R.E. (51) nga komuna e Likovës – i punësuar në Njësinë Rajonale të Kumanovës në pozicionin nëpunës riarkivist, në periudhën nga 01.12.2018 deri më 30.04.2024 nuk ka ardhur fare në punë dhe ka marrë rregullisht pagë dhe kontribute nga fondet buxhetore. I raportuari i dytë Z.A. (59) nga Shkupi, ushtrues detyre drejtor i Agjencisë së Ushqimit dhe Veterinarisë deri më 14 dhjetor 2020, me vetëdije i ka lejuar të raportuarit të parë të marrë pagë dhe kontribute edhe pse ai nuk i ka kryer detyrat e tij të punës. I raportuari i tretë N.B. (61) nga Manastiri, ushtrues detyre drejtor i Agjencisë së Ushqimit dhe Veterinarisë, nga 15.12.2020 deri më 03.07.2024, lejoi që të vazhdojë pagesa e pagave për R.E., i cili nuk u paraqit në punë gjatë gjithë angazhimit të tij në punë. I pandehuri i katërt, A.B. (59) nga Shkupi, në pozicionin e Udhëheqësit të Departamentit për Çështje Financiare në Agjenci, në periudhën nga dhjetori 2018 deri në prill 2024, pa kryer një kontroll të duhur të rregullsisë, nënshkroi raporte financiare dhe miratoi pagesën e pagave mujore dhe kontributeve të të pandehurit të parë, edhe pse nuk ishte në listat e pranisë. I pandehuri i pestë, S.K. (58) nga Shtipi, i punësuar si Udhëheqës i një Departamenti në Agjenci, nga dhjetori 2018 deri në prill 2024, nuk ndërmori masa për të parandaluar situatën e paligjshme në lidhje me të pandehurin e parë.”, thuhet në njoftimin e MPB-së.

Ndryshe me veprimet e këtilla, të pandehurit të parë i janë paguar në mënyrë të paligjshme 1.159.081 denarë, ndërsa buxheti i shtetit është dëmtuar me një shumë prej 1.682.759 denarësh, njoftoi Ministria e Brendshme.