Bytyqi: Manipulimi i ri i PBB-së nga Mickoski, me inflacion prej 5.7%, standardi i jetesës po bie

Të nderuar qytetarë,

të nderuar përfaqësues të mediave,

Kryeministri Mickoski fillimisht e shpalli Maqedoninë si “ekonominë e tretë me rritjen më të shpejtë në Evropë”, ndërsa dje e uli ambicien në “pesë vendet e para në Evropë sipas rritjes së PBB-së”.

Por, si në rastin e parë, ashtu edhe në të dytin, bëhet fjalë për të njëjtin qëllim politik: nga një shifër statistikore të krijohet një përrallë ekonomike, ndërkohë që qytetarët jetojnë në një realitet ekonomik makth.

Ekonomia nuk matet me vetëlavdërime, por me atë që qytetarët realisht mund të blejnë me pagën e tyre — sa kilogramë fruta, sa mish, sa litra qumësht, sa karburant, sa ditë të jetës së tyre janë të mbushura me dinjitet.

Enti Shtetëror i Statistikës publikoi rritje të PBB-së prej 3,1% në tremujorin e parë. Por i njëjti raport tregon se konsumi final ka pjesëmarrje prej madje 86,4% në PBB. Ky është një parametër kyç i ekonomisë, të cilin kryeministri dje e heshti.

Rritja kryesisht vjen nga konsumi, ndërsa konsumi rritet në kushte të çmimeve të larta, përkatësisht inflacionit.

Kur qytetarët paguajnë më shumë për të njëjtat produkte, konsumi nominal rritet. Por kjo nuk do të thotë jetë më e mirë, kjo do të thotë jetë më e shtrenjtë.

Nëse PBB-ja rritet 3,1%, ndërsa inflacioni është 5,7%, atëherë çmimet rriten më shpejt se ekonomia. Në realitet, qytetarët shpenzojnë më shumë para, ndërsa në shtëpi sjellin më pak produkte.

Ta nxjerrim ekonominë nga qendra për shtyp e Qeverisë dhe ta vendosim aty ku e ka vendin — në treg dhe në market. Atje, me 1.000 denarë mund të blihen 2 kilogramë qershi nga 140 denarë, 1,5 kilogram pjeshkë nga 95 denarë, 1,5 kilogram kajsi nga 130 denarë, një tabaka me 30 vezë për 275 denarë dhe vetëm 150 gramë fileto pule. Pra, një mijë denarëshe mezi mbulon disa kilogramë fruta sezonale, një tabaka vezë dhe një copë të vogël mishi.

Qeveria mund të festojë përqindje, por qytetarët çdo ditë numërojnë denarë.

Të nderuar,

Kryeministri flet për rritje, por nuk flet se ushqimi dhe pijet joalkoolike janë shtrenjtuar për rreth 8% në nivel vjetor. Nuk flet se inflacioni në Maqedoni është 5,7%, ndërsa në Bashkimin Evropian është 3,2%, kurse në eurozonë 3%. Kjo do të thotë se qytetarët tanë janë nën presion më të madh të çmimeve sesa qytetarët evropianë.

Kryeministri flet edhe për prodhim industrial. Po, në prill ka rritje prej 7,6%. Por, në janar prodhimi industrial ishte ulur për 6,6%, në shkurt për 4,2%, ndërsa për katër muajt e parë të vitit rritja është vetëm 0,2%. Kjo më shumë i ngjan stagnimit sesa ngritjes industriale.

Edhe më serioze është se numri i punëtorëve në industri në prill është ulur për 2,3%, ndërsa në katër muajt e parë për 3%. Nuk mund të shpallet sukses industrial derisa industria humb punëtorë.

Ndërtimtaria rritet për 7,2%, por edhe këtu historia ka anën tjetër. Çmimet e banesave në Shkup në tremujorin e parë janë më të larta për 16,7% në nivel vjetor. Nëse ndërtimtaria rritet, ndërsa shtëpia bëhet gjithnjë e më e paarritshme, atëherë rritja e PBB-së nuk sjell siguri dhe dinjitet.

Investimet bruto rriten vetëm 1,8%, që është dëshmi se nuk mund të flitet për sukses ekonomik strukturor që do të krijojë vlerë të shtuar të qëndrueshme për standardin jetësor.

Për më tepër, investimet e huaja direkte ranë nga 269,9 milionë euro në tremujorin e fundit të vitit 2025 në 218,6 milionë euro në tremujorin e parë të vitit 2026. “Suksesi” ekonomik që e feston kryeministri, në të njëjtin tremujor humbi 51,3 milionë euro investime të huaja.

Dhe këtu zbulohet edhe një dimension tjetër që Qeveria përpiqet ta fshehë — borxhi publik dhe financimi i likuiditetit. Kur rritja e PBB-së mbështetet në konsum, ndërsa shteti paralelisht merr hua për ta ruajtur likuiditetin, bëhet fjalë për mbajtje artificiale të aktivitetit ekonomik me para që do t’i kthejnë qytetarët. Borxhi publik, me huamarrjen e re prej 260 milionë eurosh, po i afrohet 11,1 miliardë eurove. Kemi një model ekonomik në të cilin Qeveria sot përpiqet të marrë përfitim politik, ndërsa qytetarët nesër do ta paguajnë çmimin.

Të nderuar,

Rritja e PBB-së që ushqehet nga inflacioni nuk sjell zhvillim, rritja që mbështetet në borxh nuk çon drejt sigurisë dhe rritja që nuk e rrit fuqinë blerëse të qytetarëve nuk është sukses.

Përparim i vërtetë ekonomik ka vetëm atëherë kur qytetari me pagën e tij mund të blejë më shumë, të jetojë më i sigurt dhe të planifikojë të ardhmen pa frikë nga lartësia e faturës së radhës.