Nënshkruhen marrëveshje për mbështetje teknike dhe financiare për kompanitë e shërbimeve komunale në Republikën e Maqedonisë

Kryetari i Komunës së Kumanovës, Maksim Dimitrievski, sot mori pjesë në ceremoninë e nënshkrimit të marrëveshjeve për mbështetje teknike dhe financiare në kuadër të projektit: “Kompani të Shërbimeve Komunale Rezistente dhe Efikase në Maqedoni”.

Aktivitetet e projektit po zbatohen në bashkëpunim me Qeverinë e Republikës së Maqedonisë, të përfaqësuar nga Ministria e Mjedisit dhe Planifikimit Hapësinor, dhe Qeverinë e Konfederatës Zvicerane, të përfaqësuar nga Sekretariati Shtetëror për Çështje Ekonomike (SECO).

Qëllimi i projektit është përmirësimi i kapaciteteve teknike, organizative dhe financiare të kompanive të shërbimeve publike, përmes ndërhyrjeve të fokusuara për të zvogëluar humbjet e ujit, për të rritur efikasitetin e energjisë, përdorimin e burimeve të rinovueshme të energjisë dhe për të futur sisteme moderne të menaxhimit dhe faturimit.

Në këtë aktivitet morën pjesë përfaqësues të Ambasadës së Zvicrës në Republikën e Maqedonisë, përfaqësues të Qeverisë së Republikës së Maqedonisë, kryetarë bashkish dhe drejtorë të ndërmarrjeve publike nga komunat që nënshkruan marrëveshjet.