Vasfije Krasniqi thirrje Osmanit, Kurtit, e KGJK-së që të angazhohen në shqyrtimin e rasteve të refuzuara të të mbijetuarave të dhunës seksuale

Vasfije Krasniqi, ish-deputete e Kuvendit e njëherit edhe e mbijetuar e dhunës seksuale gjatë luftës në Kosovë ka bërë të ditur se ka rinisur procesi i aplikimit për njohje të statusit të viktimave të dhunës.

Krasniqi tha se njeh shumë viktima të cilave u është refuzuar statusi, ndaj ka kërkuar nga Presidentja Osmani, Kryeministri Kurti si dhe nga Këshilli Gjyqësor i Kosovës që këto raste të shqyrtohen.

“Është humbur shumë kohë dhe shumë viktima kanë vdekur në errësirën e traumës së tyre, Ju lutem mos lejoni që kjo të ndodhë edhe me të tjerat”, tha ajo.

Postimi i plotë:

Letër e hapur

Komisioni Qeveritar/NJVSPDHLÇK ka rifilluar procesin e aplikimit për njohje të statusit të viktimave të dhunës seksuale gjatë luftës së fundit në Kosovë. Personalisht kam takuar qindra viktima, shumë prej të cilave u është refuzuar paarsyeshëm statusi. Si viktimë, që kam kaluar gjithashtu nëpër një proces të mundimshëm verifikimi kërkoj nga Presidentja Vjosa Osmani, Kryeministri Albin Kurti dhe Nga Këshilli Gjyqësor i Kosovës të angazhohen që rastet e refuzuara të shqyrtohen, dhe të mbijetuarave që me vite po presin vendimet e gjykatave t’u njihet statusi. Është humbur shumë kohë dhe shumë viktima kanë vdekur në errësirën e traumës së tyre, Ju lutem mos lejoni që kjo të ndodhë edhe me të tjerat.