LIKOVË, SHPËRNGULJA NË MËRGIM ZBRAZË VENDIN (VIDEO)

APELE MOS TË BRAKTISET VENDLINDJA, JETË KA EDHE KËTU

Kushtet e vështira e ekonomike dhe dëshira për një jetë më të mirë edhe në Komunën e Likovës kanë ndikuar që shumë të rinjë por edhe familje të tëra të marrin rrugën e kurbetit, raporton Televizioni FESTA. Banorët e kësaj komune para kamerës sonë shprehen se shkaktar kryesor i largimit të të rinjëve është papunësia dhe gjedja gjithnjë e më e vështirë ekonomike që po troket në çdo shtëpi.

“Po, ka që janë shpërngul, po dalin për arsye të veta, për një jetë më të mirë. Vërehet se numri i banorëve po zvoglohet, ju po e shifni edhe vet edhe pse tani Ramazan por për çdo ditë është kështu, ndoshta do të bëhet edhe më keq”, u shpreh banori i komunës së Likovës.

“Ska mbet askush, deri më parë kishim të ri, por tani nëse të duhet ndonjë i ri për punë nuk ke, ditë e për ditë veç ikin, shkojnë. Nuk iu vjen turp Qeverisë, flasin për ngrirjen e çmimit të Makaronave, por leje more Makaronat le të bëhen edhe 200 den, uleni çmmimin e rrymës, derivative të naftës, ule standardin ku ndikon në jetë”, theksoi banori i komunës së Likovës.

“Kemi mbet pa rini, ska, ikën të gjithë”, u shpreh banori i komunës së Likovës.

Largimi i të rinjëve nga vendi, një pjesë e të cilëve po i marrin edhe familjet e tyre me vete, po vërehet edhe në zvogëlimin e numrit të nxënësve nëpër shkollat e Komunës së Likovës.

“Këto 3 vitet e fundit shihet edhe në bazë të fletë shpërnguljeve që mirren gjatë tërë vitit, kështuqë sivjet viti shkolorë 2022/23 janë marrë afërsisht 50 fletë shpërngulje në nivle komunal prej Llojani e deri në Nikushtak, më së shumti nga fshatrat malore por ka numër të konsiderueshëm edhe nga fshatrat fushore”, theksoi përgjegjësi për arsim në komunën e Likovës, Xhevdet Rramani.

Por në mesin e banorëve të Likovës ka të atillë që po mendojnë se edhe këtu ka kushte për jetë, dhe që po e kundërshtojnë ikjen e të rinjëve nga vendëlindja.

“Unë jam kryetar i katundit edhe po kam qejf t’i ndali se edhe neve po na duhen për punë, e kam sipërmarrjen dhe nuk kam punëtorë, nuk ka rini po shkojnë, por besoj se një ditë kanë me u kthy se edhe këtu ka nisur me ec kah e mira”, u shpreh banori i komunës së Likovës.

“I lutem të rinjëve, mos të largohen prej këtu, mos ta lëshojnë vendin se ky vend është i joni, unë 50 vjet i bëra në kurbet më është mërzitur jeta, së pari djemt që më kanë mbetur atje, besoni se shumë keq është, shumë vështirë. Ju lus mos të largoheni”, theksoi banori i komunës së Likovës.

Edhe përkundër përpjekjeve për të hapur vende pune nëpër bizneset lokale, pronarët e kompanive thonë se me ikjen e të rinjëve në shtetet perëndimore në masë të madhe po vërehet mungesa e punëtorëve, që ka ndikuar edhe në ngecjen e realizimit të proekteve të shumta afariste. /TV FESTA/